公用房託

忽傳息魔來光顧，公用房託焗捱沽

地方政府融資產品，項目安全有保證，8%～10%定息，推廣期 - 豁免手續費！


　　《小傳日記》日前１０年期美債息突然抽高至超過２％水平，創出一年高位，令到唔少缸友
都擔心，美國真係好快會加息退市。習慣咗喺「大開水喉」之下過日子，缸友一聽到「退市」自
必然係幾擔心，魚缸噚日跌咗３６９點之後，今日早段反反覆覆，但係午市喺日股拖累之下亦一
度跌超過２００點，連５０日線同保歷加通道底部都失守埋。不過一穿呢個支持位又有資金入市
撈貨，魚缸更試過倒升添。全日恆指要跌７０點，收報２２４８４；國貨指數就跌６１點報
１０６８９。
　　魚缸成交有６７９億銀，繼續保持跌市高成交，真係要小心小心。
　
＊大市好反覆請自求多福，避險也捱沽沽到無嘢沽？＊
　
　　美國隔晚１０年國債債息喺財政部發新一批債之後升到１３個月高，收息股吸引力降低，基
金隨即抽走資金，收息股全線急跌，公用股都避唔過要跌，煤氣（００００３）連跌第８日，今
日收市再蒸發３﹒７個巴仙，係跌得最多嘅藍籌，中電（００００２）第一季賣電少咗４個巴仙
，股價就一日冇３﹒３個巴仙，連埋近日已經跌唔少嘅電能實業（００００６）都唔見咗３﹒７
巴仙收市，齊齊失守５０天線。有返幾厘息口嘅長建（０１０３８）今次都無走雞，大成交下碌
低３﹒７個巴仙走人。
　　收息股又點少得房託個份？領匯（００８２３）噚日已經先跌４個巴仙，今日再跌多４個巴
仙落樓，４０蚊關都守唔住。越秀房產信託（００４０５）都跌半成，陽光房地產信託
（００４３５）同置富產業信託（００７７８）一樣孖住挫半成，連同跌４個巴仙嘅泓富產業信
託（００８０８）都要失守５０天線。
　
＊地主怕息魔唯有沽之哉，大象與中移逆市輕踏前＊
　
　　噚日班地主股嘅股價已經同美國債息調頭走，今日走勢亦都係偏弱。新世界發展
（０００１７）再跌多３﹒３巴仙，恆隆地產（００１０１）同大好友（０００８３）就各跌
２﹒６巴仙及２巴仙，仲有長實（００００１）新地（０００１６）都唔見１﹒３巴仙及２﹒５
巴仙。依家只不過係「加息狼來了」已經咁多淡友興風作浪，萬一真係殺到埋嚟仲得掂？
　　以前公用股就係避難股，今日反而升起晒嘅食品股。魚缸排頭兩位嘅係康師傅
（００３２２）同旺旺（００１５１），各漲２巴仙及１﹒９巴仙。重磅股大象（００００５）
只係輕輕貢獻０﹒４巴仙，中移（００９４１）今日股東會，公司話唔可能長時間維持高盈利增
長，今日和和過過，微升一格收市。
　
＊華銳累街坊風電齊碌低，太多不明朗鐵路打倒褪＊
　
　　祖國公司都啲消息可以跟進返。全國最大嘅風電組裝機生產商華銳風電畀中國證監會立案調
查，懷疑佢地可能出現篤數事件。雖然華銳只係喺祖國上市，不過呢個消息就直接影響到香江上
市嘅風電股。業務性質最相似嘅係金風科技（０２２０８），今日股價就插低５﹒８巴仙，另外
中國風電（００１８２）同埋中國傳動（００６５８）就分跌碌低６巴仙及３﹒１巴仙散場。
　　另一單料，就係有消息指出，由原先鐵道部改組成嘅鐵路總公司鐵路，將會要求國務院免除
佢地高達２﹒６６萬億人仔嘅債務。仲有消息話，佢地計劃取消晒之前訂立嘅合同，要再重新簽
過。重簽合同涉及好多不明朗因素，中鐵（００３９０）今日就唔見１﹒７巴仙，中交建
（０１８００）亦碌低１﹒９巴仙，仲有南車（０１７６６）更要跌２巴仙埋單。
　
＊只要係靚殼內房不寂寞，軟件跑得遠復星見埋鑊＊
　
　　細價股當然又要講下啲內房殼股。炒到有升無跌嘅恆力商業地產（００１６９）今日繼續升
勢，全日踢高１５巴仙埋單，另外隻金地商置（００５３５）亦見佢炒落後，漲５巴仙散場。
　　軟件股亦都繼續炒上，金山軟件（０３８８８）再升６﹒７巴仙見新高位，網龍
（００７７７）即將派季績，今日亦漲６巴仙亦係創出高。復星國際（００６５６）公布佢地同
馬雲合組「菜鳥網絡」，仲話會用５億人仔拎到１０％股權，噚日股價已經炒高，今日再漲
１０﹒４巴仙埋單。
　
＊生於跌浪中朗廷要深潛，中煉化相伴何日浮水面？＊
　
　　由鷹君（０００４１）分拆出嚟嘅朗廷（０１２７０）可以話係生不逢時，遇着洗板洗着收
租股，朗廷一開市已經潛水，之後愈潛愈深，落到４﹒５４銀收市，低５蚊嘅發售價９﹒２個巴
仙。鷹君噚日跌完今日再跌１﹒６巴仙
　　個人電子產品維修服務供應商電訊首科（０８１４５）今日以配售形式創業板上市，配股價
只係１蚊，一開報就已經喺３個５全日高位，之後好快回歸現實，升幅一路收窄落到一個幾銀水
平，收市報１﹒４２元，都有四成二水位。
　　至於上星期先上市嘅中煉化（０２３８６）再創上市新低繼續深潛，全日唔見２﹒８巴仙散
場。請請！